ຂໍ້ແນະນຳເຕັກນິກການຕົກກ້າ ດາປ໋ອກ ( DAPOG )

ການກຽມກ້າດາປ໋ອກ
ແມ່ນເປັນວິທີການໜື່ງເພື່ອແກ້ໄຂໃນເວລາສຸກເສີນ ແລະ ເພື່ອເຮັດໃຫ້ການຜະລິດທັນກັບລະດູການເຊັ່ນ: ສະພາວະທີ່ແຫ້ງແລ້ງ, ນ້ຳຖ້ວມ. ເຕັກນິກດັ່ງກ່າວນີ້ແມ່ນສາມາດເຮັດໄດ້ທຸກເວລາ ແລະ ບໍ່ຕ້ອງການເນື້ອທີ່ ສ່ວນຫຼາຍວັດຖຸທີ່ນຳໃຊ້ກໍ່ເປັນວັດສະດຸພື້ນບ້ານ ວິທີການປະຕິບັດກໍ່ແບບງ່າຍດາຍ.
ວັດຖຸທີ່ໃຊ້ໃນການເຮັດໜານກ້າ.
– ພື້ນຊີມັງ, ແຜ່ນຢາງ ຫຼື ໃບຕອງກ້ວຍ ( ປູໜ້າໜານກ້າ )
– ລູກກິ້ງ ຫຼື ກົມແກ້ວ ( ສຳລັບປັບໜ້າໜານກ້າ ຫຼື ແປງປະທາ )
– ບົວຫົດນ້ຳ ( ໃຊ້ສຳລັບຫົດນ້ຳ )
– ຟອຍກ້ານພ້າວ
– ໄມ້ສຳລັບເຮັດຂອບຕາກ້າ ຫຼື ກາບກ້ວຍ
– ໄຖ່ປ່ານ ( ໃຊ້ໃນເວລາບົ່ມເຂົ້າ )
– ເມັດພັນ ( ພັນປັບປຸງ )
• ທີ່ມີຄວາມງອກ 85% ຂຶ້ນໄປ, ອັດຕາ 100 – 120 ກິໂລ/ເຮັກຕາ
• ເນື້ອທີ່ 1 ຕາແມັດ/3 ກິໂລກຼາມ, ເນື້ອທີ່ຕົກກ້າ 40 – 50 ຕາແມັດ/ເຮັກຕາ
ຂັ້ນຕອນ ແລະ ວິທີການປະຕິບັດ
ຂັ້ນຕອນກະກຽມ.

– ແຊ່ເມັດພັນໃຊ້ເວລາປະມານ 24 – 36 ຊົ່ວໂມງ
– ການບົ່ມເມັດພັນໃຊ້ເວລາປະມານ 24 ຊົ່ວໂມງ. ການບົ່ມແມ່ນສັງເກດເຫັນເມັດພັນແຕກສົບນົກກີ້ຈິ່ງນຳມາຢາຍໃສ່ໜານທີ່ກຽມໄວ້.
– ສະຖານທີ່ ຮົ່ມໄມ້, ໃນເຮືອນ ຫຼື ບ່ອນທີ່ບໍ່ມີແສງແດດຫຼາຍ.
ວິທີການປະຕິບັດ.
ການກ້າໃສ່ພື້ນດິນ.ຂະໜາດຂອງໜານກ້າແມ່ນກວ້າງປະມານ 1 ແມັດ, ສ່ວນລວງຍາວແມ່ນຕາມຄວາມເໝາະສົມ, ປັບໜ້າດິນໃຫ້ຮາບພຽງດີ, ນຳເອົາກາບກ້ວຍ ຫຼື ໄມ້ຂະໜາດ 4 x 8 ເຮັດຂອບ, ສ່ວນບໍລິເວນກ້ອງໜານແມ່ນໃຊ້ກາບກ້ວຍທີ່ປາດເອົາການອອກ ຫຼື ໃຊ້ຜ້າຢາງປູກໍ່ໄດ້, ຫຼັງຈາກນັ້ນໃຫ້ເຮັດຮ່ອງລະບາຍນ້ຳຈາກພື້ນໜານ.

ເອົາເຂົ້າຢາຍລົງໃສ່ໜານສູງປະມານ 1 – 2 ຊັງຕີແມັດ

ສິ່ງທີ່ຄວນເອົາໃຈໃສ່.
– ການຫົດນ້ຳມື້ໜື່ງ 3 ຫາ 4 ເທື່ອ ຫຼື ເອົາຟອຍຈຸ່ມນໍ້າແລ້ວຊິດໆໃສ່, ພາຍຫຼັງການຫົດນໍ້າທຸກເທື່ອໃຫ້ເອົາແກ້ວລິ້ງ ຫຼື ເອົາໄມ້ຕົບໜານກ້າໃຫ້ແຈບເພື່ອບໍ່ໃຫ້ເມັດເຂົ້າຟູຂຶ້ນ.
– ເມື່ອກ້າອາຍຸໄດ້ປະມານ 9 – 14 ມື້, ຕົ້ນກ້າຈະມີຄວາມສູງປະມານ 10 – 12 ຊັງຕີແມັດ. ກໍ່ໃຫ້ນໍາເອົາດໍາ, ແຕ່ບໍ່ໃຫ້ກາຍ 16 ມື້ ( ເພາະວ່າອາຫານໃນເມັດເຂົ້າໄດ້ໝົດແລ້ວ ).
• ຂໍ້ຄວນລະວັງ

ການຫວ່ານແນວພັນເຂົ້າໃຫ້ສະໝ່ຳສະເໝີ

ການປັບໜ້າດິນເພື່ອເປັນການປົກຄຸມເມັດພັນເຂົ້າ
ວິທີການເອົາກ້າໄປດຳ.
ເມື່ອອາຍຸກ້າໄດ້ຕາມກຳນົດແລ້ວແມ່ນໃຫ້ກໍ້ຄືກັບກໍ້ສາດແລ້ວກໍ່ສີກອອກໄປດຳ.

ການປັກດຳ.
– ກະກຽມດິນໃຫ້ລະອຽດບໍ່ໃຫ້ມີນ້ຳຂັງ
– ດືງກ້າອອກປັກດຳ 2 ຫາ 3 ຕົ້ນຕໍ່ສຸມ
– ຄວາມເລິກແມ່ນ 1 ຫາ 2 ຊັງຕີແມັດ ຫຼື ປະມານ 1 ຂໍ້ມື ເພາະກ້າສັ້ນ.
– ໄລຍະຫ່າງແມ່ນ 12 – 15 ຊັງຕີແມັດ ຫຼື 20 x 20 ຊັງຕີແມັດ
ການບົວລະບັດຮັກສາ.
– ກ່ອນການປັກດໍາແມ່ນໃຫ້ໃສ່ຝຸ່ນຮອງພື້ນສູດ 16:20:00 ໃນອັດຕາ 150 ຫາ 200 ກິໂລ/ເຮັກຕາ.
– ຫຼັງຈາກການປັກດຳປະມານ 20 ຫາ 25 ມື້ໃສ່ຝຸ່ນເລັ່ງ 46:00:00 ໃນອັດຕາ 50 ກິໂລຕໍ່ເຮັກຕາເພື່ອແຕກກໍ
– ຫຼັງປັກດຳ 40 ຫາ 45 ວັນ, ໃຫ້ໃສ່ຝຸ່ນເລັ່ງ 46:00:00 ອັດຕາ 50 ກິໂລ/ເຮັກຕາ
– ຄວນດູແລ ແລະ ຄຸ້ມຄອງລະບົບນ້ຳ ແລະ ພະຍາດບົ້ງແມງ.
ການຕົກກ້າໃສ່ພື້ນຊີມັງ.
– ເຮັດຂອບໜານກ້າດ້ວຍໄມ້ ຫຼື ກາບກ້ວຍກໍ່ໄດ້
– ນຳເອົາເມັດພັນທີ່ບົ່ມແລ້ວມາຢາຍໃສ່ໜານກ້າຄືກັບວິທີທີ 1
– ສ່ວນຂັ້ນຕອນຂອງການປະຕິບັດແມ່ນຄືກັບວິທີທີ 1
– ການປັກດຳ ແລະ ການບົວລະບັດຮັກສາແມ່ນປະຕິບັດຂອດເຕັກນິກດຽວກັນ.

ແຫຼ່ງຂໍ້ມູນ: ແຜ່ນພັບ ຂໍ້ແນະນຳເຕັກນິກການຕົກກ້າ ດາປ໋ອກ, ກອງສົ່ເງເສີມກະສິກຳ ແລະ ປ່າໄມ້ ແຫ່ງຊາດ, ພະແນກວິຊາການ, ໜ່ວຍງານຝຶກອົບຮົມ ຂັ້ນສູນກາງ

ຂໍ້ມູນເພີມຕື່ມ:

ຂໍ້ມູນເຕັກນິກ:

ວີດີໂອ:

ຮຽບຮຽງໂດຍ: ສຸລິວົງ ກອງມະນີວົງ, ສູນຂໍ້ມູນຂ່າວສານກະສິກຳ ແລະ ປ່າໄມ້, ສະຖາບັນຄົ້ນຄ້ວາກະສິກຳ, ປ່າໄມ້ ແລະ ພັດທະນາຊົນລະບົດ