ຄູ່ມືການປູກ ແລະ ການຜະລິດເມັດຫຍ້າມູລາໂຕ II

1. ເປັນຫຍັງຈຶ່ງປູກ ມູລາໂຕ II
ຫ້ຍາມູລາໂຕ II ເປັນຫຍ້າອາຫານສັດເຂດຮອ້ນພັນໃໝ່ທີ່ມີຄຸນນະພາບດີ (ໂປຣຕີນ 14 %) ໃຫ້ຜົນຜະລິດສູງ ແລະ ເປັນຫຍ້າທີ່ສາມາດປັບຕົວເຂົ້າກັບສະພາບແວດລອ້ມໄດ້ດີ

2. ການເລືອກພື້ນທີປູກ.
ຄວນເລືອກທີ່ສູງ ບໍ່ມີນໍ້າຖວ້ມຂັງ, ດິນບໍ່ເປັນກົດຈັດ ຫຼື ດິນເຄັມ.
3. ຊ່ວງເວລາປູກ.
ຊ່ວງເວລາປູກທີ່ເໝາະສົມໃນລະຫວ່າງເດືອນພຶດສະພາ ຫາ ເດືອນມີຖຸນາ.
4. ການປູກ
ກຽມພື້ນທີ່ໂດຍການໄຖດິນຕາກ 3 ອາທິດ ແລ້ວໄຖພວນດິນອີກ ເພື່ອກໍາຈັດວັດສະພືດ ຈາກນັ້ນ 1 ອາທິດ ຄາດດິນແຕກມຸ່ນ ແລະ ຮາບພຽງດີ ເພື່ອເໝາະໃນການ ຝັງຕົວຂອງເມັດພັນ, ໃສ່ປຸ໋ຍສູດ 15-15-15 ໃນອັດຕາ 50 ກລ/ໄຮ່ ( 1,600ມ2 ) ເປັນປຸ໋ຍຮອງພື້ນ ຫຼື ອາດປະສົມກັບຝຸ່ນຄອກ ເພື່ອເພີ່ມອິນຊີວັດຖຸໃນດິນ.
ຖ້າປູກເພື່ອລ້ຽງສັດ ຢອດເມັດ ຫລຸມລະ 5-6 ເມັດ ໄລຍະຫ່າງ 70 X 70 ຊມ.
ຖ້າປູກເພື່ອເກັບເມັດພັນ ຢອດເມັດ ຫລຸມລະ 5-6 ເມັດ ໄລຍະຫ່າງ ລະຫວ່າງຫລຸມ 80 ຊມ. ລະຫວ່າງແຖວ 100 ຊມ.

5. ການກໍາຈັດວັດສະພືດ.
ກໍາຈັດວັດສະພືດຫຼັງຈາກປູກຫຍ້າແລ້ວ 3-4 ອາທິດ ແລະ ຄັ້ງຕໍ່ໆ ໄປຕາມຄວາມຈໍາເປັນ.
6. ການນໍາໃຊ້ປະໂຫຍດ.
ເລີ່ມຕັດໃຫ້ສັດກິນເທື່ອທໍາອິດເມື່ອຫຍ້າມີອາຍຸ ປະມານ 45-50 ວັນ ຫຼັງຈາກປູກ ແລະ ຕັດເທື່ອຕໍ່ໄປທຸກໆ 35-40 ວັນ ໂດຍຕັດສູງຈາກໝ້າດິນ ປະມານ 10-12 ຊມ. ແລ້ວໃສ່ປຸ໋ຍຢູເຣຍ ( 46-0-0 ) ອັດຕາ 10 ກິໂລ/ໄຮ່ ຫຼັງຈາກຕັດທຸກຄັ້ງ. ຖ້າປູກໃນພື້ນທີ່ ທີ່ອາໄສນໍ້າຝົນຢ່າງດຽວຈະໃຫ້ຜົນຜະລິດນໍ້າໝັກຫຍ້າ ສົດ 6-8 ໂຕນ/ໄຣ່/ປີ.

7. ການຕັດປັບສະພາບເພື່ອເກັບເມັດພັນ.
ເພື່ອເຮັດໃຫ້ຫຍ້າອອກດອກຢ່າງສະໝໍ່ສະເໝີ ອາດຕັດຫຍ້າໃຫ້ສັດກິນກອ່ນ 1 ຮອບ ກອ່ນສິ້ນເດືອນກໍລະກົດ ເພາະຫຍ້າຕ້ອງການຊ່ວງເວລາໃນການຈະເລີນເຕີບໂຕກອ່ນອອກດອກໃນເດືອນ ຕຸລາ ປະມານ 106-124 ວັນ.
8. ການເກັບກ່ຽວເມັດພັນ.
ເມື່ອຫຍ້າອອກດອກ ຄວນກະກຽມການເກັບເມັດ ໂດຍໃຊ້ເຊືອກຟາງມັດຊໍ່ດອກເຂົ້າຫາກັນເພື່ອສະດວກໃນການເກັບເມັດຫຍ້າຈະເລີ່ມແກ່ຫຼັງຈາກອອກດອກປະມານ 22-29 ວັນ ໃນໄລຍະນີ້ໃຫ້ໝັ່ນສັງເກດ ແລະ ເລີ່ມເກັບເມັດທັນທີ ເມື່ອ ເມັດແກ່ ໂດຍການເຄາະຮວງ ຄື: ເຄາະ 1 ເທື່ອ ແລ້ວເວັ້ນ 2 ມື້ ກັບມາເຄາະອີກເລື່ອຍໄປຈົນໝົດ.
ເມັດພັນທີ່ໄດ້ໃຫ້ນໍາໄປຕາກໃນບອ່ນຮົ່ມ 2 ວັນ ເພື່ອລົດຄວາມຊຸ່ມ ແລ້ວນໍາອອກມາຕາກແດດອີກ 1 ວັນ ການຕາກເມັດ ຄວນເຂ່ຍປີ້ນກັບເມັດເລື່ອຍໆ ເພື່ອໃຫ້ເມັດແຫ້ງຢ່າງສະໝໍາສະເໝີ ຫຼັງຈາກນັ້ນ ທໍາຄວາມສະອາດໂດຍກາຍໃຊ້ກະດົ້ງຝັດສິ່ງເຈືອປົນອອກໄປ.
ຜົນຜະລິດເມັດຈະໄດ້ປະມານ 40 ກລ/ໄຮ່ ຂື້ຢູ່ກັບຄວາມອຸດົມສົມບູນຂອງດິນ, ການໃສ່ຝຸ່ນ ແລະ ການບົວລະບັດຮັກສາ.

9. ການເກັບຮັກສາເມັດພັນ.
ຄວນເກັບສາເມັດພັນໄວ້ໃນຮົ່ມ ແລະ ແຫ້ງ ເມັດພັນຈະມີໄລຍະການພັກໂຕຫຼັງຈາກເກັບກ່ຽວ ປະມານ 4 ເດືອນ ໝາຍຄວາມວ່າ ຖ້າຈະນໍາເມັດພັນດັ່ງກ່າວໄປປູກ ຄວນໃຫ້ເມັດພັນໄດ້ພັກໂຕຫຼັງເກັບກ່ຽວ 4 ເດືອນ ຈຶ່ງຈະໄດ້ຮັບຜົນດີ.

ຮຽບຮຽງໂດຍ: ເດືອນເພັງ ສີຫາລາດ
ໝວດໝູ່: ການປູກຫ້ຍາ
ແຫຼ່ງຂໍ້ມູນ: ບໍລິສັດໄຟຟ້ານໍ້າເທີນ 2; ພະແນກສິ່ງແວດລອ້ມ ແລະ ສັງຄົມ; ໂຄງການລຸ່ມເຂື່ອນ ແລະ ເຮືອນຈັກ; ໝວ່ຍງານຟື້ນຟູຊີວິດການເປັນຢູ່.
ຂໍ້ມູນເພີມຕື່ມ:
ຂໍ້ມູນແນວພັນ:
ວິດີໂອ:

ຕິດຕໍ່: