ການປູກໝາກເຜັດຢວກ

ການກຽມດິນ.
ຂຸດໄຖດິນໃຫ້ເລິກປະມານ 25 ຫາ 30 ຊມ, ຕາກດິນໄວ້ປະມານ 7 ຫາ 10 ວັນ, ໃສ່ຝຸ່ນຄອກ ຫຼື ຝຸ່ນບົ່ມທີ່ລະລາຍຕົວດີແລ້ວຈຳນວນ 12 ຫາ 13 ໂຕນ/ເຮັກຕາ. ຖ້າດິນມີຄວາມເປັນກົດສູງຄວນໃຊ້ປູນຂາວຊ່ວຍໃນຈຳນວນ 1,200 ຫາ 1,300 ກິໂລ/ເຮັກຕາ ເພື່ອຊ່ວຍຫຼຸດຜ່ອນຄວາມເປັນກົດຂອງດິນ. ຈາກນັ້ນກໍ່ປະສົມກັບດິນ ແລະ ຍ່ອງດິນໃຫ້ມິຂະໜາດນ້ອຍຫຼັງຈາກໃສ່ປູນຂາວແລ້ວ 15 ຫາ 20 ມື້ ຈິ່ງປູກເບ້ຍໝາກເປັດໄດ້.
ການກ້າເບ້ຍ.
ຫຼັງຈາກກຽມໜານກ້າແລ້ວໃຫ້ຫວ່ານເມັດພັນໃຫ້ກະຈາຍທົ່ວໜານ ຫຼື ເຮັດເປັນແຖວຫ່າງກັນ 15 ຊັງຕີແມັດ, ເຮັຮ່ອງເລິກປະມານ 1 ຊັງຕີແມັດ. ແລ້ວໂຮຍເມັດພັນລົງໃນຮ່ອງແລ້ວປົກດ້ວຍຝຸ່ນຄອກ, ຝຸ່ນບົ່ມ ຫຼື ດິນລະອຽດກໍ່ໄດ້ໃຫ້ໜາປະມານ 0.5 ຫາ 1.0 ຊັງຕີແມັດ. ຫົດນ້ຳໃຫ້ຊຸ່ມແລ້ວປົກດ້ວຍເຟືອງ ຫຼື ຫຍ້າແຫ້ງບາງໆ. ຫຼັງຈາກເບ້ຍງອກໄດ້ 15 ຫາ 20 ມື້ໃຫ້ຫຼົກແຍກຕົ້ນທີ່ບໍ່ສົມບູນອອກພ້ອມກັນນັ້ນໃຫ້ພະຍາຍາມຈັດໄລຍະຫ່າງເບ້ຍໃຫ້ຫ່າງກັນປະມານ 10 ຊັງຕີແມັດ.

ການປູກຕົ້ນໝາກເຜັດຢວກ.
ໄລຍະປູກທີ່ເໝາະສົມສຳລັບຕົ້ນໝາກເຜັດຢວກຄວນໃຊ້ໄລຍະຫ່າງລະຫວ່າງຕົ້ນຕໍ່ຕົ້ນ 50 ຊັງຕີແມັດ, ລະຫວ່າງແຖວຕໍ່ແຖວ 60 ຊັງຕີແມັດ. ຫຼັງຈາກ.ຍມໜານປູກແລ້ວກໍ່ນຳເອົາເບ້ຍທີ່ໄດ້ຂະໜາດດີແລ້ວໄປປູກໄດ້ເລີຍ. ຕົ້ນເບ້ຍທີ່ຈະຍ້າຍມາປູກຄວນເປັນຕົ້ນທີ່ແຂງແຮງອາຍຸປະມານ 30 ຫາ 40 ມື້ ສູງປະມານ 10 ຫາ 15 ຊັງຕີແມັດ, ການຫຼົກເອົາເບ້ຍຄວນໃຫ້ມີດິນຕິດຫຼາຍທີ່ສຸດ ແລະ ເຮັດຢ່າງລະມັດລະວັງ. ເບ້ຍທີ່ຫຼົກມາຕ້ອງຮີບປູກທັນທີ, ການປູກຄວນບີບດິນອ້ອມຕົ້ນເບ້ຍໃຫ້ແໜ້ນ ແລະ ລະວັງຢ່າໃຫ້ຮາກຂາດເພາະຈະເຮັດໃຫ້ຕົ້ນໝາກເຜັດລົ້ມໄດ້ງ່າຍເພາະວ່າຕົ້ນໝາກເຜັດມີຮາກແຜ່ກະຈາຍຢູ່ໜ້າດິນ. ຫຼັງຈາກປູກແລ້ວຫົດນ້ຳໃຫ້ຊຸ່ມໃຊ້ເຟືອງ ຫຼື ຫຍ້າແຫ້ງປົກຄຸມດິນເຮັດຮ້ານບັງແດດ ເພື່ອປ້ອງກັນບໍ່ໃຫ້ເບ້ຍຖືກແດດກ້າໃນໄລຍະເລີ່ມຍ້າຍປູກໃໝ່ໆເພາະວ່າເບ້ຍຈະໃຫຍ່ຊ້າ ຫຼື ແຫ້ງຕາຍ.

ການບົວລະບັດຮັກສາ.
ການໃສ່ຝຸ່ນ.
ຝຸ່ນທີ່ແນະນຳຄືຝຸ່ນເຄມີສູດ 15-15-15 ຫຼື 14-14-21 ໃສ່ໃນຈຳນວນ 300 ຫາ 500 ກລ/ຮຕ ຂຶ້ນກັບຄວາມອຸດົມສົມບູນຂອງດິນໂດຍແບ່ງໃສ່ 2 ເທື່ອ. ເທື່ອທີ 1 ໃສ່ປະມານເຄິ່ງໜຶ່ງຮອງພື້ນແລ້ວພວນດິນປົກ. ເທື່ອທີ 2 ໃສ່ອີກເຄິ່ງໜຶ່ງທີ່ຍັງເຫຼືອໃສ່ເມື່ອຕົ້ນໝາກເຜັດມີອາຍຸໄດ້ 30 ວັນ ຫຼັງຈາກຍ້າຍປູກໃສ່ແບບໂຮຍຂ້າງຕົ້ນແລ້ວພວນດິນປົກ.
ການໃຫ້ນ້ຳ.
ຄວນໃຫ້ທຖກໆວັນຫຼັງຈາກປູກຈົນເຖີງເບ້ຍຕັ້ງໂຕໄດ້ປະມານ 5 ຫາ 6 ອາທິດ. ຫຼັງຈາກນັ້ນຈິ່ງຫຼຸດຜ່ອນປະລິມານນ້ຳລົງຊຶ່ງອາດຈະໃຫ້ນ້ຳ 3 ເທື່ອຕໍ່ມື້ກໍ່ໄດ້ຕ້ອງຫຼຸດສະພາບຄວາມຊຸ່ມຊື້ນຂອງດິນອີກດ້ວຍ. ຢ່າໃຫ້ນ້ຳປຽກ ຫຼື ແຫ້ງເກີນໄປເພາະຈະເຮັດໃຫ້ຕົ້ນໝາກເຜັດຢຸດສະງັກການຈະເລີນເຕີບໂຕ.

ການເກັບກ່ຽວ
ອາຍຸການເກັບກ່ຽວຂອງໝາກເຜັດຢວກແຕ່ວັນງອກເຖີງວັນເກັບກ່ຽວ 90 ຫາ 120 ມື້. ການເກັບເດັດເອົາເທື່ອລະໝາກໃຊ້ເລັບມືເດັດເອົາຮອຍຕໍ່ກ້ານໝາກກັບກິ່ງ.

ແຫຼ່ງຂໍ້ມູນ: ຄັດຈາກປື້ມ: ຂໍ້ແນະນຳເຕັກນິກການປູກໝາກເຜັກຢວກ, ໂຄງການສົ່ງເສີມກະສິກຳ

ຂໍ້ມູນເພີມຕື່ມ:

ຂໍ້ມູນເຕັກນິກ:

ວີດີໂອ:

ຕິດຕໍ່:

ຮຽບຮຽງໂດຍ: ສຸລິວົງ ກອງມະນີວົງ, ສູນຂໍ້ມູນຂ່າວສານກະສິກຳ ແລະ ປ່າໄມ້, ສະຖາບັນຄົ້ນຄ້ວາກະສິກຳ, ປ່າໄມ້ ແລະ ພັດທະນາຊົນລະບົດ