ຂໍ້ແນະນໍາເຕັກນິກການນໍໃຊ້ EM

ຂໍ້ແນະນໍາເຕັກນິກການນໍໃຊ້ EM

1. ຄຸນລັກສະນະໂດຍທົ່ວໄປຂອງ EM.
• EM ເປັນຂອງແຫຼວສີນໍ້າຕານ ມີກິ່ນສົ້ມ ອົມຫວານ
• ເປັນກຸ່ມຈຸລີນຊີທີ່ມີຊິວິດ ແລະ ບໍ່ສາມາດໃຊ້ຮວ່ມກັບສານເຄມີ, ຢາປະຕິຊິວະນະ ຫຼື ຢາຂ້າເຊື້ອຕ່າງໆໄດ້
• EM ບໍ່ແມ່ນສານອັນຕະລາດຕໍ່ສິ່ງທີ່ມີຊິວິດເຊັ່ນ: ຄົນ, ສັດ, ພືດ ແລະ ແມງໄມ້ທີ່ເປັນປະໂຫຍດ
• EM ຊວ່ຍປັບປຸງສະພາບຄວາມສົມດຸນຂອງສິ່ງແວດລອ້ມ
• EM ເປັນຈຸລີນຊີທີ່ຄົນເຮົາສາມາດນໍາໄປເພາະຂະຫຍາຍເພື່ອນໍາໃຊ້ແກ້ໄຂບັນຫາຕ່າງໆໄດ້ດວ້ຍຕົນເອງ

2. ລັກສະນະການຜະລິດ.
ໂດຍການເພາະຂະຫຍາຍຈາກຈຸລີນຊີທີ່ມີປະໂຫຍດກວ່າ 80 ຊະນິດຈາກກຸ່ມ:
• ສັງເຄາະແສງ ( Photosynthetic bacteria )
• ຜະລິດກົດແລກຕິກ ( Lactic acid bacteria )
• ໄນໂຕຼເຈນ ( Nitrogen fixing bacteria )
• ເອທີໂນມັຍຊີສ ( Actinomycetes )
• ກຸ່ມຈຸລິນຊີຢີສ ( Yeasts )
ກຸ່ມຈຸລິນຊີດັ່ງກ່າວໄດ້ມາຈາກທະນາຄານຈຸລີນຊີນໍາມາເພາະລ້ຽງ ແລະ ຂະຫຍາຍດວ້ຍເຕັກໂນໂລຊີພິເສດໂດຍນໍາໃຊ້ອາຫານຈາກທໍາມະຊາດເຊັ່ນ: ນໍ້າຕານ, ໂປຼຕິນ, ຮໍາ, ເຂົ້າ ແລະ ສານປະກອບອື່ນໆ. ດັ່ງນັ້ນ, ຈຶ່ງບໍ່ເປັນອັດຕະລາຍຕໍ່ສິ່ງທີ່ມີຊີວິດ.
3. ການເກັບຮັກສາ.
• EM ຫົວເຊື້ອສາມາດເກັບຮັກສາໄວ້ໄດ້ດົນປະມານ 6 ເດືອນ ໃນອຸນຫະພູມຫ້ອງປົກກະຕິ 25-45 c ໂດຍປິດຜາໃຫ້ແໝ້ນຢ່າໃຫ້ອາກາດເຂົ້າ ແລະ ຢ່າເກັບໄວ້ໃນຕູ້ເຢັນ
• ທຸກຄັ້ງທີ່ໃຊ້ຕ້ອງປິດຜາໃຫ້ແໝ້ນ
• ການຂະຫຍາຍ EM ຄວນນໍາໃຊ້ພາຊະນະ ແລະ ນໍ້າທີ່ສະອາດໃຊ້ໃຫ້ໝົດພາຍໃນເວລາທີ່ເໝາະສົມ
4. ເຕັກນິກການຂະຫຍາຍ EM
4.1. ການເຮັດ EM ຂະຫຍາຍ
ເອົາ EM ຫົວເຊື້ອ 1 ລິດ, ເສດນໍ້າຕານ 1 ລິດ ແລະ ນໍ້າ 20 ລິດປະສົມເຂົ້າກັນໃສ່ໃນຕຸກປິດຜາໄວ້ເຖິງ 7 ມື້ ແລະ ຈຶ່ງນໍາມາໃຊ້ໃຫ້ໝົດພາຍໃນ 7 ມື້.

4.2. ການເຮັດ EM 5
ເອົາຫົວເຊື້ອ EM 1 ລິດ, ເສດນໍ້າຕານ 1 ລິດ, ເຫຼົ້າຂາວ 1 ລິດ, ນໍ້າສົມສາຍຊູ 1 ລິດ ແລະ ນໍ້າສະອາດ 1 ລິດ ປະສົມເສດນໍ້າຕານກັບນໍ້າໃຫ້ລະລາຍກອ່ນແລ້ວຈຶ່ງຕື່ມ EM, ເຫຼົ້າຂາວ, ນໍ້າສົມສາຍຊູລົງ ແລ້ວໃສ່ໃນຕຸກ 10 ລິດ ປິດຜາໄວ້ເຖິງ 15 ວັນ ຈຶ່ງນໍາໄປໃຊ້ ແລະ ໄຂຜາລະບາຍແກ້ສອອກທຸກວັນແລ້ວອັດຄືເກົ່າ, ສາມາດເກັບຮັກສາໄວ້ໄດ້ເຖິງ 3 ເດືອນ.
4.3. ການເຮັດ ຊຸບເປີສຸໂຕຈຸ
ເອົາຫົວເຊື້ອ EM 1ລິດ, ເຫຼົ້າຂາວ 2 ລິດ, ນໍ້າສົມສາຍຊູ 5% 1 ລິດ ແລະ ເສດນໍ້າຕານ 1 ລິດ ປະສົມເສດນໍ້າຕານ ແລະ ນໍ້າສົມສາຍຊູໃຫ້ລະອຽດກອ່ນ ແລ້ວຈຶ່ງຕື່ມເຫຼົ້າຂາວ ແລະ EM ລົງ ແລ້ວໃສ່ໃນຕຸກ 5 ລິດອັດຝາໄວ້ 24 ຊົ່ວໂມງແລ້ວນໍາໄປໃຊ້ສິດປາບແມງໄມ້ທີ່ປາບຍາກເຊັ່ນ: ບົ້ງຮໍາໃບ ແລະ ອື່ນໆໃນອັດຕາ 10 ຊຊ ຕໍ່ນໍ້າ 5-10 ລິດ ແລະ ກໍາຈັດເຫັບ, ໝັດໃນສັດລ້ຽງ ໃນອັດຕາ 100 ຊຊ ຕໍ່ນໍ້າ 5 ລິດ.
4.4. ການເຮັດນໍ້າສະກັດຈາກການໝັກສະໝຸນໄພ ຫຼື EMFPE
ນໍາເອົາຊີ້ນສວ່ນຕ່າງໆຂອງພືດສະໝຸນໄພມາຕັດເປັນຕອ່ນນອ້ຍໆ ໃຫ້ໄດ້ 1 ຖັງ (ຖັງຂະໝາດ 10 ລິດ ໃສ່ລົງໃນຖັງ, ເອົາຫົວເຊື້ອ EM ແລະ ເສດນໍ້າຕານ 300 ຊຊ ບວກນໍ້າ 10 ລິດ ປະສົມໃຫ້ລະລາຍເຂົ້າກັນແລ້ວຖອກລົງໃນຖົງສະໝຸນໄພ, ໃຊ້ຜ້າຢາງປົກປາກຖັງ ແລະ ເອົາກອ້ນຫີນເຕັງທັບຜ້າຢາງໃຫ້ແຈບແລ້ວປິດຝາຖັງໝັກໄວ້ 7 ວັນ, ເມື່ອໝັກໄດ້ 3 ວັນໃຫ້ຄົນສະໝຸນໄພໃນຖົງ ເມື່ອໄດ້ກໍານົດ 7 ວັນແລ້ວຕອງເອົາແຕ່ນໍ້າສະກັດໄປນໍາໃຊ້, ສວ່ນເສດສະໝຸນໄພນໍາໄປໃຊ້ໃສ່ນໍາສວ່ນຜັກ, ນາເຂົ້າ.
4.5. ການເຮັດ EM BOKASHI (ຝຸ່ນຄອກໝັກກັບ EM)
4.5.1. ສ່ວນປະກອບ
ຂີ້ສັດທຸດຊະນິດ 1 ສວ່ນ (ບໍລິມາດ) ແກບດິບ 1 ສວ່ນ (ບໍລິມາດ), ຮໍາລະອຽດ 1 ສວ່ນ (ບໍລິມາດ) EM ຫົວເຊື້ອ 100 ຊຊ, ເສດນໍ້າຕານ 100 ຊຊ ແລະ ນໍ້າ 10 ລິດ,
4.5.2. ວິທີເຮັດ
ປະສົມແກບດິບກັບຂີ້ສັດໃຫ້ເຂົ້າກັນໃນພື້ນຊີມັງ ຫຼື ພື້ນດິນປູດວ້ຍຜ້າຢ່າງ, ປະສົມ EM ກັບເສດນໍ້າຕານ ແລະ ນໍ້າໃສ່ໃນບົວຂະໝາດ 10 ລິດ ແລ້ວຫົດຫົວໃສ່ກອງແກບ ແລະ ຂີ້ສັດພອ້ມທັງຄົນໃຫ້ໄດ້ຄວາມຊຸ່ມສະໝໍ່າສະເໝີປະມານ 50 % ຖ້າຫາກຄວາມຊຸ່ມຍັງບໍ່ທັນຮອດ 50 % ກໍ່ຕ້ອງໄດ້ປະສົມ EM ນໍ້າ ແລະ ເສດນໍ້າຕານອີກຕື່ມແລ້ວຫົດ ແລະ ຄົນອີກຈາກນັ້ນນໍາເອົາຮໍາຖອກລົງຄົນໃຫ້ເຂົ້າກັນ ແລະ ແປງເປັນກອງຮາບພຽງສະໝໍ່າສະເໝີຄວາມສູງຂອງກອງຝຸ່ນປະມານ 15-20 ຊົງຕິແມັດ ແລະ ປົກຄຸ່ມດວ້ຍເປົ່າປ່ານໝັກໄວ້ 3 ວັນ ແລ້ວຈຶ່ງນໍາໄປໃຊ້ໄດ້, ໂດຍແຕ່ລະວັນໃຫ້ກວດເບິ່ງອຸນຫະພູມຂອງກອງຝຸ່ນ ແລະ ບົ່ມຖ້າຫາກມີອຸນຫະພູມຮ້ອນປະມານ 40-50 ອົງສາ ໃຫ້ເຮັດຝຸ່ນເປັນກອງ ແລະ ປົກຄຸມດວ້ຍເປົ່າປ່ານຄືເກົ່າ.

5. ເຕັກນິກການນໍາໃຊ້.
• ປະສົມ EM ຫົວເຊື້ອ ຫຼື EM ຂະຫຍາຍກັບນໍ້າອັດຕາ 10 ຊຊ ( 1 ບ່ວງ )/ ນໍ້າ 10 ລິດ ເພື່ອສິດ ແລະ ຫົດພືດຜັກ, ນາເຂົ້າ, ຕົ້ນໄມ້ກິນໝາດ, ໄມ້ປະດັບອາທິດລະ 1-2 ຄັ້ງ
• ປະສົມ EM ຫົວເຊື້ອກັບນໍ້າອັດຕາ 5 ຊຊ (ເຄິ່ງບ່ວງ) ຕໍ່ນໍ້າ 10 ລິດ ໃຫ້ສັດລ້ຽງກິນເຊັ່ນ: ເປັດ, ໄກ່, ໝູ ແລະ ອື່ນໆເປັນປະຈໍາຈະເຮັດໃຫ້ສັດລ້ຽງແຂງແຮງມີພູມຕ້ານທານຕໍ່ເຊື້ອພະຍາດ
• ໃຊ້ EM ຂະຫຍາຍ 1 ລິດ ຕໍ່ນໍ້າ 100 ລິດ ສີດລ້າງພື້ນຄອກສັດ: ຄອກໝູ, ຄອກງົວ, ຄອກໄກ່ ສາມາດກຳຈັດກິ່ນເໝັນໄດ້ພາຍໃນ 24 ຊົ່ວໂມງ, ສີດອາທິດລະ 1-3 ເທື່ອ
• ໃຊ້ EM 5 ໃນອັດຕາ 10 ຊຊ ປະສົມນໍ້າ 5 ລິດສີດພົ່ນ ຕາມພືດຜັກ, ນາເຂົ້າ, ຕົ້ນໄມ້ກິນໝາກ, ໄມ້ປະດັບ ແລະ ຕາມຄອກສັດລ້ຽງທີ່ມີແມງວັນຈະຊວ່ຍປ້ອງກັນແມງໄມ້ສັດຕູພືດຕ່າງໆໄດ້, ເວລາພືດອອກດອກຄວນປະສົມຈາງລົງ
• ໃຊ້ EMFPE (ນໍ້າສະກັດຈາກການໝັກສະໝຸນໄພ) ໃນອັດຕາ 10 ຊຊ ປະສົມນໍ້າ 5-10 ລີດ ສິດພົ່ນພືດຜັກ, ນາເຂົ້າ, ໄມ້ໃຫ້ໝາກ, ໄມ້ປະດັບ ຈະເຮັດໃຫ້ພືດມີພູມຕ້ານທານຕໍ່ພະຍາດຕ່າງໆ ແລະ ສາມາດສິດພື້ນທີ່ກຽມປູກພືດຕ່າງໆເພື່ອຂ້າເຊື້ອພະຍາດໃນດິນຕາມອັດຕາສວ່ນດຽວກັນ
• ໃຊ້ EM BOKASHI (ຝຸ່ນຄອກໝັກກັບ EM) ໃນອັດຕາ 200-500 ກຼາມ ໂຮຍຮອງພື້ນທີ່ດິນກອ່ນປູກພືດຜັກຕ່າງກອ່ນດໍານາເຂົ້າ, ກອ່ນປູກເບ້ຍໄມ້ກິນໝາກຕ່າງໆ ແລະ ຫົດດວ້ຍນໍ້າຫົວເຊື້ອ EM ຫຼື EM ຂະຫຍາຍໃນອັດຕາສວ່ນ 10 ຊຊ ປະສົມນໍ້າ ລິດ. ຖ້າໄມ້ກິນໝາກອາຍຸ 1-2 ປີໃຫ້ໃສ່ໂຮຍອອ້ມຕົ້ນ 1-2 ກິໂລຕໍ່ຕົ້ນ ແລະ ຫົດຕາມດວ້ຍນໍ້າຫົວເຊື້ອ EM
• ໃຊ້ EM ຂະຫຍາຍໃນອັດຕາສວ່ນ 1 ລິດ ຕໍ່ນໍ້າ 10.000 ລິດ ຫຼື 1 ລິດ ຕໍ່ນໍ້າ 10 ແມັດກອ້ນໃສ່ລົງໃນສາລ້ຽງປາ, ລ້ຽງກຸ້ງ, ລ້ຽງກົບທຸກໆ 7-10 ວັນຈະເຮັດໃຫ້ນໍ້າບໍ່ເສຍຊວ່ຍເປັນ pH ຂອງນໍ້າ
• ໃຊ້ EM ຂະຫຍາຍເພື່ອບໍາບັດນໍ້າເສຍທີ່ມີກິນແໝ້ນ ຕາມຮ່ອງນໍ້າ, ຕະຫຼາດ, ໂຮງງານ, ຫ້ອງນໍ້າໃນອັດຕາສວ່ນ 1 ລີດ ປະສົມນໍ້າ 100 ລີດ ຖອກລົງຕາມບອ່ນນໍ້າເສຍດັ່ງກ່າວຈະເຮັດໃຫ້ນໍ້າດີຂື້ນບໍ່ມີກິ່ນແໝ້ນ ແລະ ເຮັດໃຫ້ສິ່ງແວດລອ້ມດີຂື້ນ
6. ຄຸນປະໂຫຍດຂອງການນໍາໃຊ້ EM
6.1. ດ້ານການກະເສດ
• ຊວ່ຍປັບສະພາບຄວາມເປັນກົດ-ດ່າງໃນດິນ ແລະ ນໍ້າໃຫ້ເປັນກາງ
• ຊວ່ຍແກ້ບັນຫາຈາກແມງໄມ້ສັດຕູພືດ ແລະ ພະຍາດລະບາດຕ່າງໆ
• ຊວ່ຍປັບສະພາບດິນໃຫ້ຮວ່ນຊຸ່ມອຸ່ມນໍ້າ ໃຫ້ອາກາດຜ່ານໄດ້ຢ່າງເໝາະສົມ
• ຊວ່ຍຍອ່ຍສະຫຼາຍອິນຊີວັດຖຸໃຫ້ເປັນອາຫານແກ່ພືດ ພືດຈະດູດຊືມໄດ້ເລີຍ ໂດຍບໍ່ສູນເສຍພະລັງງານຫຼາຍ
• ຊວ່ຍສ້າງຮໍໂມນພືດ ເພື່ອໃຫ້ຜົນຜະລິດສູງໄດ້ຄຸນນະພາບດີຂື້ນ
6.2. ທາງດ້ານການລ້ຽງສັດ
• ຊວ່ຍກໍາຈັດກິ່ນເໝັນຈາກຂີ້ສັດໄດ້ 24 ຊົ່ວໂມງ
• ຊວ່ຍບໍາບັດນໍ້າເສຍຈາກຟາມພາຍໃນ 1 ອາທິດ
• ຊ່ວຍປ້ອງກັນໂຣກອະຫິວາ ແລະ ໂຣກລະບາດຕ່າງໃຊ້ແທນຢາປະຕິຊີວະນະຕ່າງໆໄດ້
• ຊວ່ຍເສີມສຸກສະພາບຂອງສັດເຮັດໃຫ້ສັດແຂງແຮງມີຄວາມຕ້ານທານຕໍ່ພະຍາດໃຫ້ຜົນຜະລິດສູງອັດຕາການຕາຍຫຼຸດລົງ
6.3. ດ້ານການປະມົງ
• ຊວ່ຍແກ້ບັນຫາພະຍາດໃນນໍ້າທີ່ເປັນບັນຫາຕໍ່ກຸ້ງ, ປາ, ກົບ ຫຼື ສັດນໍ້າອື່ນໆ
• ຊວ່ຍຮັກສາພະຍາດບາດແຜຕ່າງໆໃນປາ, ກົບ
• ຊວ່ຍຫຼຸດຜອ່ນປະລິມານຂີ້ເລນໃນບໍ່ ຂີ້ເລນບໍ່ເນົ່າ ສາມາດນໍາໄປປະສົມເຮັດປຸ໋ຍໝັກໄດ້ດີ
6.4. ດ້ານສິ່ງແວດລອ້ມ
• ຊວ່ຍບໍາບັດນໍ້າເສຍຈາກການກະເສດ, ການລ້ຽງສັດ, ການປະມົງ, ໂຮງງານອຸດສະຫະກຳ, ຊຸມຊົນ ແລະ ອື່ນໆ
• ກຳຈັດກິ່ນຂີ້ເຫຼື່ອຍດວ້ຍການຍ່ອຍສະຫຼາຍໃຫ້ມີຈໍານວນນອ້ຍລົງ ແລະ ສາມາດນໍາໄປໃຊ້ປະໂຫຍດອື້ນໄດ້

ຮຽບຮຽງໂດຍ: ເດືອນເພັງ ສີຫາລາດ
ໝວດໝູ່: ການເຮັດນໍ້າໝັກ

ແຫຼ່ງຂໍ້ມູນ: ກອງສົ່ງເສີມ ກະສິກຳ ແລະ ປ່າໄມ້; ພະແນກວິຊາການ
ຂໍ້ມູນເພີມຕື່ມ:
ຂໍ້ມູນແນວພັນ:
ວິດີໂອ:

ຕິດຕໍ່