ວິທີການປູກ ຫົວກະລົດໄວ້ກິນເອງ

I. ລັກສະນະທົ່ວໄປ
1. ຮາກ ແລະ ຕົ້ນ

ມີລັກສະນະຄ້າຍຄືຕົ້ນຜັກຊີລຳຕົ້ນສູງຢູ່ຕິດກັບຂົ້ວຫົວສ່ວນຮາກກໍ່ຄືຫົວ ທີ່ເຮົານຳມາກິນຈັດວ່າເປັນຮາກແກ້ວມີຂະໜາດ ແລະ ສີແຕກຕ່າງກັນແລ້ວແຕ່ສາຍພັນ ຄວາມຍາວປະມານ 20-30 ຊມ, ໃບ ແຕກອອກຮອບໆລຳຕົ້ນບໍລິເວນສ່ວນເທິງສຸດຂອງຫົວ 5-10 ໃບ ປະກອບດ້ວຍກ້ານໃບຍາວສີຂຽວອອ່ນຍາວປະມານ 20-40 ຊມ, ຂື້ນຢູ່ກັບສາຍພັນ ໃບມີລັກສະນະຄ້າຍຄືຜັກຊີ ແຕກໃບຍ່ອຍອອກເປັນຄູ່ ປະມານ 3-5 ຄູ່ ແລະ ປາຍໃບມີໃບຍ່ອຍໃບດຽວ.
2. ສະພາບແວດລ້ອມທີ່ເໝາະສົມ
ກະລົດສາມາດຈະເລີນເຕີບໂຕໄດ້ດີໃນລະດູໜາວ ອຸນຫະພູມລະຫວ່າງ 25-28 ອົງສາເຊ ຖ້າອຸນຫະພູມສູງ
ກວ່າ 28 ອົງສາ ຈະເຮັດໃຫ້ໃບກະລົດຫົດ ແລະ ອຸນຫະພູມທີ່ເໝາະສົມກັບການຈະເລີນເຕີບໂຕຂອງຫົວແມ່ນ 18-21 ອົງສາເຊ , ກະລົດເປັນພືດທີ່ຕ້ອງການແສງຫຼາຍພໍສົມຄວນ ໂດຍທົ່ວໄປປະມານ 9-14 ຊົ່ວໂມງ/ມື້, ສາມາດຈະເລີນເຕີບໂຕໄດ້ດີໃນດິນລະອຽດ ແລະ ຜຸຜຸ່ຍໜ້າດິນເລິກ, ມີອິນຊີວັດຖຸຫຼາຍ, ລະບາຍນໍ້າໄດ້ດີ, PH ຂອງດິນ 6,5-6,5 ຖ້າປູກໃນດິນໜຽວ ຫຼື ດິນແຂງຈະເຮັດໃຫ້ຫົວກະລົດແຕກ ແລະ ຮູບຫົວບໍ່ງາມ ຖ້າປູກບ່ອນມີຄວາມຊຸ່ມຫຼາຍຈະເຮັດໃຫ້ຫົວກະລົດມີຈຸດມີດຳ ແລະ ອາດຈະເຮັດໃຫ້ຫົວເນົ່າໄດ້.

II. ຂັ້ນຕອນໃນການປູກ
1. ການຕຽມດິນ

ອາດຈະປູກເປັນໜານ ຫຼື ເປັນແຖວເລີຍກໍ່ໄດ້ ແຕ່ຕ້ອງຂຸດດິນເລິກປະມານ 30 ຊມ ແລະ ທຸບດິນໃຫ້ລະອຽດເກັບຫີນ ແລະ ໄມ້ທີ່ໃຫຍ່ອອກເພື່ອໃຫ້ຫົວກະລົດຂະຫຍາຍໂຕດີ ຫຼັງຈາກນັ້ນໂຮຍປູນຂາວຕາກແດດໄວ້ ປະມານ 1-2 ອາທິດ, ຖ້າຈະປູກເປັນໜານກໍ່ແປງໜານປະໄວ້ເລີຍກໍ່ໄດ້.
2. ການປູກ ຫຼື ຕຽມຕົ້ນກ້າ
– ປູກແບບຕົ້ນກ້າ: ໜານຕຽມຕົ້ນກ້າ ແລະ ໜານປູກຄວນຈະໃສ່ຝຸ່ນບົ່ມ, ແກບເຜົາ ຫຼື ແກບເນົ່າ ແລະ ອາດຈະໃສ່ປຸຍສູດ 12-24-12 ເພີ່ມອີກກໍ່ໄດ້ ປະສົມກັບດິນໃຫ້ເຂົ້າກັນດີແລ້ວປັບໜ້າດິນໃຫ້ພຽງ, ຫວ່ານແກ່ນພືດລົງໃນໜານບາງໆແລ້ວໃຊ້ດິນຖົມບາງໆ ປົກດ້ວຍເຟືອງເຂົ້າເພື່ອຮັກສາຄວາມຊຸ່ມຫົດນ້ຳໃຊ້ຊຸ່ມຊື່ນທັງເຊົ້າ ແລະ ແລງ ຈົນກວ່າແກ່ນຈະງອກເປັນຕົ້ນກ້າໄດ້ 15-20 ມື້ ຫຼື ມີ 3-5 ໃບ ຈື່ງຫຼົກເອົາໄປປູກໃນໜານທີ່ຕຽມໄວ້ໄລຍະຫ່າງປະມານ 10 x 10 ຫຼື 10×15 ຊມ ຫົດນໍ້າທຸກມື້ເຊົາແລງໃຫ້ຊຸ່ມຊື່ນ ແຕ່ຢ່າໃຫ້ນໍ້າອັ່ງເພາະຫົວກະລົດຈະເນົ່າ.
– ການປູກແບບຢອດແກ່ນໃນໜານທີ່ຕຽມໄວ້ໃຊ້ໄມ້ຂີດຮ່ອງເລິກປະມານ 1 ຊມ ແລ້ວຢອດແກ່ນກະລົດລົງ
ໄປເທື່ອລະ 1 ແກ່ນ ຫ່າງກັນ 1 ຊມ ເມື່ອແກ່ນແຕກງອກໄດ້ 15-20 ມື້ ຫຼື ມີ 3-5 ໃບ ກໍ່ຫຼົກອອກໃຫ້ໄດ້ໄລຍະຫ່າງ 3 ຊມ, ເມື່ອໄດ້ 30-35 ມື້ ຫຼື ມີ 8-9 ໃບຫຼົກອອກໃຫ້ເຫຼືອໄລຍະຫ່າງ 5-8 ຊມ, ຄວນລະວັງ ແລະ ໝັ່ນສັງເກດຊ່ວງຢອດແກ່ນທຳອິດຢ້ານມົດ ຫຼື ແມງໄມ້ຄາບແກ່ນອອກ.

3. ການບົວລະບັດຮັກສາ
– ເມື່ອຕົ້ນພືດມີອາຍຸໄດ້ປະມານ 20-25 ວັນ ກໍ່ກໍາຈັດວັດສະພືດ ແລະ ພວນດິນຄ່ອຍໆ
– ຫຼັງຈາກນັ້ນໃສ່ປຸຍສູດ 15-15-15 ໃນອັດຕາ 30-50 ກຣາມ/m2
– ຫຼັງຈາກໃສ່ປຸຍຄັ້ງທຳອິດໄດ້ປະມານ 15-20 ມື້ກໍ່ໃສ່ປຸຍອີກຄັ້ງທີ່ 2 ສູດ 13-13-21 ໃນອັດຕາ 30-50 ກຣາມ/ m2
4. ການເກັບຜົນຜະລິດ
ເມື່ອອາຍຸໄດ້ 100-120 ວັນກໍ່ເລີ່ມເກັບຜົນຜະລິດໄດ້ເລີຍໂດຍການຂຸດເອົາຫົວກະລົດແລ້ວລ້າງນໍ້າໃຫ້ສະອາດຕາກໃຫ້ແຫ້ງດີ ລະວັງຢ່າໃຫ້ກະລົດມີຮອຍເປີກເພື່ອການເກັບຮັກສາ ນຳໄປປຸງແຕ່ງອາຫານຕາມຕ້ອງການ ຫຼື ນຳໄປຂາຍເພື່ອສ້າງລາຍຮັບໃຫ້ແກ່ຄອບຄົວໄດ້.
5. ພະຍາດ ແລະ ແມງໄມ້ທີ່ສຳຄັນ
ກະລົດເປັນພືດທີ່ຕ້ານທານຕໍ່ພະຍາດ ແລະ ແມງໄມ້ໄດ້ດີສົມຄວນຈຶ່ງບໍ່ຄ່ອຍຈະມັກເກີດມີພະຍາດຫຼາຍປານໃດແຕ່ກໍ່ມີພະຍາດບາງຊະນິດເຊັ່ນ: ພະຍາດໃບຈຸດ, ເຊື້ອລາແປ້ງ, ພະຍາດກ່ຽວກັບຮາກທີ່ເກີດຈາກຂີ້ກະເດືອນຝອຍ.

ແຫຼ່ງທີ່ມາ:  www.kasetorganic.com

ຜູ້ຮຽບຮຽງ: ລັດຕະນາ ໄຊຍະວົງ

ໝວດໝູ່: ພືດຜັກ

ຂໍ້ມູນເພີມຕື່ມ:

ຂໍ້ມູນເຕັກນິກ:

ວີດີໂອ:

ຕິດຕໍ່: