ເຂົ້ານາຊາງ (Naxang)
ປະຫວັດຄວາມເປັນມາ.
ແນວພັນເຂົ້າໜຽວນາຊາງມາຈາກ ສປ ຈີນ ທີ່ປະຊາຊົນບ້ານອ່າຍ ແລະ ບ້ານນາສະຫວ່າງ, ເມືອງໄຊໄດ້ນຳເຂົ້າມາຈາກພີ່ນ້ອງຢູ່ 12 ພັນນາ ໃນປີ 2006 – 2007 ແລະ ໃນປີ 2008 – 2009 ໂຄງການອີຣີ-ອີຟາດ ກໍ່ໄດ້ແນະນຳປູກຢູ່ເມືອງອື່ນໆ ໃນແຂວງອຸດົມໄຊ. ປູກແນວພັນເຂົ້ານາຊາງປະມານ 60% ທັງນາປີ ແລະ ນາແຊງ.
ລັກສະນະປະຈຳພັນ.
| ປະເພດເຂົ້າ | ເຂົ້າໜຽວ |
| ຜົນຜະລິດ | 4 – 5,5 ໂຕ່ນຕໍ່ເຮັກຕາ |
| ອາຍຸ | 135 – 140 |
| ລັກສະນະແຕກກໍ | ແຕກກໍປານກາງ ແລະ ມີຊົງລຳຕົ້ນຕັ້ງຊື່ດີ |
| ລວງສູງ | ປະມານ 89 ຊັງຕີແມັດ |
| ລັກສະນະຂອງລຳຕົ້ນ | ແຂງແຮງດີ ແລະ ບໍ່ລົ້ມເວລາສຸກແກ່ |
| ລັກສະນະຂອງໃບ | ສີຂຽວຈາງ, ໃບ ແລະ ໃບວີຕັ້ງຊື່ |
| ສີເມັດເຂົ້າເປືອກ | ສີເຫຼືອງແກ່ |
| ຂະໜາດເມັດເຂົ້າສານ | ຍາວ 10.81 ມີລີແມັດ, ກວ້າງ 3.1 ມີລີແມັດ, ໜາ 2.16 ມີລີແມັດ |
| ຮູບຮ່າງ | ຮຽວ |
| ນ້ຳໜັກ | 1,000 ເມັດ 37 ກຼາມ |
| ຄຸນນະພາບການກິນ | ອ່ອນນຸ້ມດີ |
| ເປີເຊັນການສີ | ສູງ (60% ) |
ຈຸດດີ ແລະ ຈຸດອ່ອນ
ຈຸດດີ: ເປັນແນວພັນໃຫ້ຜົນຜະລິດສູງ, ສາມາດປູກໄດ້ທັງນາປີ ແລະ ນາແຊງ, ຕອບສະໜອງຕໍ່ຝຸ່ນໄນໂຕຼເຈນ (Nitrogen) ໄດ້ດີ ແລະ ສາມາດປັບຕົວໄດ້ດີໃນສະພາບແວດລ້ອມທີ່ກວ້າງຂວາງ. ຕົ້ນສຳໝ່ຳສະເໝີ, ຖອກຮວງພ້ອມກັນ, ຄວາມສູງປານກາງ, ຕົ້ນແຂງ, ບໍ່ລົ້ມເວລາເກັບກ່ຽວ, ແຕກກໍຫຼາຍກວ່າພັນທ້ອງຖິ່ນ. ປູກບໍ່ເລືອກດິນ, ປູກຢູ່ບ່ອນແຫ້ງແລ້ງໄດ້ ( ແຫ້ງແລ້ງໃນຊ່ວງອອກຮວງແຕ່ບໍ່ສົ່ງຜົນສະທ້ອນຕໍ່ຜົນຜະລິດ ). ທົນທານຕໍ່ເພ້ຍຈັກກະຈັ່ນ ແລະ ພະຍາດໃໝ້ໃນລະດັບປານກາງ, ທົນຕໍ່ດ້ວງກໍ ( ທຽບໃສ່ທ່າດອກຄຳ 5 ) ໃນລະດັບກາງ. ສຳຄັນແມ່ນກິນອ່ອນນຸ້ມດີ. ແນວພັນນີ້ເໝາະສົມໃນເຂດພາກເໜືອເຊັ່ນ: ແຂວງອຸດົມໄຊ, ແຂວງຫຼວງນ້ຳທາ ແລະ ແຂວງບໍ່ແກ້ວ.
ຈຸດອ່ອນ: ບໍ່ທົນຕໍ່ແມງບົ່ວ, ສີໄດ້ເຂົ້າສານໜ້ອຍກວ່າເຂົ້າທ້ອງຖິ່ນເນື່ອງຈາກມີເປືອກໜາ ແລະ ເມັດລີບ, ເກີດເຂົ້າ ແລະ ແມງແຄງມັກ, ນ້ຳໜັກເບົາ ( ທຽບໃສ່ທ່າດອກຄຳ 5 ).
ວິທີປູກ.
ລະດູຕົກກ້າ ແລະ ປັກດຳ.
ນາປີ: ເຂດພາກເໜືອເລີ່ມຕົກກ້າກາງເດືອນມິຖຸນາ, ປັກດຳທ້າຍເດືອນມິຖຸນາ ແລະ ເກັບກ່ຽວຊ່ວງທ້າຍເດືອນຕຸລາ.
ນາແຊງ: ຕົກກ້າໃນກາງເດືອນພະຈິກ, ປັກດຳໃນກາງເດືອນທັນວາ ແລະ ເກັບກ່ຽວທ້າຍເດືອນພຶດສະພາ.
ອາຍຸກ້າເໝາະສົມໃນການປັກດຳ: 21 – 25 ວັນສຳລັບນາປີ ແລະ 25 – 30 ວັນສຳລັບນາແຊງ. ໃນເຂດໜາວອາຍຸກ້າອາດຈະຍາວກວ່າ, ແຕ່ຕ້ອງສັງເກດເບິ່ງຈຳນວນໃບກ້າທີ່ມີ 4.5 – 5.5 ໃບ ( ນັບທັງໃບເຄົ້າ )
ໄລຍະປັກດຳ: 20 x 20 ຊັງຕີແມັດ ຫຼື 25 ສຸມຕໍ່ຕາລາງແມັດ
ຈຳນວນກີບກ້າປັກດຳ: 3 – 4 ກີບກ້າຕໍ່ສຸມ
ອັດຕາຝຸ່ນເຄມີ:
• ຝຸ່ນຮອງພື້ນ: ປຸ໋ຍສູດ 16-20-00 ໃນອັດຕາ 150 ກລ/ຮຕ (ສໍາລັບນາດິນໜຽວ) ຫຼື 200 ກລ/ຮຕ ຂອງປຸ໋ຍສູດ 15 -15-15 ( ສໍາລັບນາດິນຊາຍ ) ຫວ່ານໃນເວລາປັກດໍາ.
• ຝຸ່ນເລັ່ງ: ຫວ່ານຝຸ່ນເລັ່ງ 2 ຄັ້ງ, ໃນເວລາ 25 – 30 ວັນ ແລະ 45 – 50 ວັນ ຫຼັງປັກດໍາ ໃນອັດຕາ 50 ກລ/ຮຕ ໃນແຕ່ລະຄັ້ງ.
ໝາຍເຫດ: ນາຕີນບ້ານ ຫຼື ດິນທີ່ມີຄວາມອຸດົມສົມບູນສູງບໍ່ຕ້ອງໃສ່ຝຸ່ນ ( ເມື່ອສັງເກດເຫັນໃບເຂົ້າຂຽວຢູ່ຕະຫຼອດ ). ສ່ວນນາດິນບໍ່ດີຄວນໃສ່ຝຸ່ນຄອກໃນອັດຕາ 3 – 5 ໂຕນ/ເຮັກຕາ ກ່ອນ.
ແຫຼ່ງຂໍ້ມູນ: ປື້ມຄຳແນະນຳການນຳໃຊ້ແນວພັນເຂົ້າສຳລັບພາກເໜືອຂອງລາວ. ໂຄງການຄົ້ນຄວ້າລະບົບການຜະລິດກະສິກຳ ໂດຍເອົາເຂົ້າເປັນພື້ນຖານ ໃນເຂດພູດອຍ ຢູ່ພາກເໜືອ.
ຂໍ້ມູນເພີມຕື່ມ:
ຂໍ້ມູນເຕັກນິກ:
ວີດີໂອ:
ຕິດຕໍ່:
ຮຽບຮຽງໂດຍ: ສຸລິວົງ ກອງມະນີວົງ, ສູນຂໍ້ມູນຂ່າວສານກະສິກຳ ແລະ ປ່າໄມ້, ສະຖາບັນຄົ້ນຄ້ວາກະສິກຳ, ປ່າໄມ້ ແລະ ພັດທະນາຊົນລະບົດ