ເຕັກນິກການປູກຫຍ້າເນເປຍ

ການກະກຽມພື້ນທີ່.
ຄວນຕ້ອງໄດ້ໄຖພວນດິນ 2 ຄັ້ງໃນການໄຖຄັ້ງທຳອິດໃຫ້ໄຖໃນເວລາທີ່ດິນມີຄວາມຊຸ່ມເໝາະສົມ ເພື່ອເປີດໜ້າດິນ, ເພື່ອກຳຈັດວັດສະພືດທີ່ປົກຄຸມຢູ່ໜ້າດິນ ແລະໄຖພວນດິນອີກຄັ້ງທີ່ 2 ເພື່ອກຳຈັດວັດສະພືດທີ່ເກີດມາໃໝ່ ຫຼັງຈາກນັ້ນກໍ່ຄາດກິນໃຫ້ລະອຽດ.

ການກຽມທ່ອນພັນ ແລະແນວພັນ.
ຫຍ້າເນເປຍທີ່ຈະເອົາມາເປັນທ່ອນພັນຄວນມີອາຍຸ 4-6 ເດືອນ, ຫຼັງຈາກນັ້ນກໍ່ເອົາມາຕັດເປັນທ່ອນ ແຕ່ລະທ່ອນຄວນມີຂໍ້ຕາຕິດມານຳປະມານ 2 ຂໍ້ ຕົ້ນຫຍ້າເນເປຍຕົ້ນໜື່ງສາມາດເອົາມາໃຊ້ເປັນທ່ອນພັນໄດ້ປະມານ 6 ທ່ອນ ຫຍ້າເນເປຍ 1 ໄລ່ ສາມາດຂະຫຍາຍພັນໄດ້ປະມານ 20 ໄລ່ (ໃຊ້ໄລຍະຫ່າງໃນການປູກປະມານ 75×75 ຊັງຕີແມັດ).

ວິທີປູກ.
ສໍາລັບການປູກຫຍ້າເນເປຍແມ່ນສາມາດປູກຂະຫຍາຍໄດ້ດ້ວຍທ່ອນພັນເທົ່ານັ້ນ ໄລຍະໃນການປູກທີ່ເໝາະສົມ 75×75 ຊັງຕີແມັດ, ປູກຂຸມລະ 2 ທ່ອນ ໃນພື້ນທີ່ 1ໄລ່ ແມ່ນຈະໃຊທ່ອນພັນປະມານ 300-500 ກິໂລກຼາມ.

ການໃສ່ຝຸ່ນ.
ການປູກຫຍ້າເນເປຍໃນພື້ນທີ່ດິນທີ່ມີລັກສະນະດິນປົນຊາຍ ຫຼືວ່າມີເນື້ອທີ່ດິນຂ້ອນຂ້າງຫຍາບຈຳເປັນຕ້ອງໄດ້ໃສ່ຝຸ່ນປະສົມສູດ 15-15-15 ໃນອັດຕາປະມານ 50-100 ກິໂລກຼາມຕໍ່ໄລ່ ເພື່ອເປັນຝຸ່ນຮອງພື້ນກ່ອນປູກ ແລະຄວນໃສ່ຝຸ່ນຄອກເພື່ອປັບປຸງ ແລະບຳລຸງດິນນຳ ແລະໃສ່ຝຸ່ນໄນໂຕຣເຈນໃນຮູບຂອງປູຍຢູເຣຍ (ສູດ 46-0-0 ໃນອັດຕາລະຫວ່າງ 10-15 ກິໂລກຼາມຕໍ່ໄລ່) ຫຼັງຈາກຕັດຫຍ້າທຸກຄັ້ງຖ້າວ່າຢູ່ໃນດິນໜຽວທີ່ມີຄວາມອຸດົມສົມບູນຂ້ອນຂ້າງສູງເຮົາກໍ່ສາມາດຫຼຸດປະລິມານ ແລະຈຳນວນຄັ້ງໃນການໃສ່ຝຸ່ນລົງໄດ້
ການກຳຈັດວັດສະພືດ.
ຄວນກຳຈັດວັດສະພືດພາຍຫຼັງທີ່ປູກຫຍ່າໄດ້ 2-4 ອາທິດ.
ການໃຫ້ນ້ຳ.
ຄວນໃຫ້ທຸກໆ 14 ມື້ ຖ້າເປັນລະດູແລ້ງຄວນປ່ອຍເຂົ້າຕາມຮ່ອງຄູ.

ການຕັດຫຍ້າເນເປຍ.
ໃນການຕັດຫຍ້າເນເປຍເພື່ອທີ່ຈະເອົາມາລ້ຽງສັດເຮົາຄວນຈະຕັດຫຍ້າເທື່ອທໍາອິດ ເມື່ອຫຍ້າມີອາຍຸຮອດ 60-70 ມື້. ຫຼັງຈາກນັ້ນໃນການຕັດຫຍ້າຄັ້ງຕໍ່ໆໄປແມ່ນຕັດທຸກໆ 30-45 ມື້ ຖ້າເປັນລະດູຝົນຫຍ້າຈະມີການຈະເລີນເຕີບໃຫຍ່ໄວ ສະນັ້ນ ເຮົາຕ້ອງຫຼຸດອາຍຸໃນການຕັດຫຍ້າລົງໃຫ້ໜ້ອຍກວ່າ 30 ມື້ ໃນການຕັດຈະຕ້ອງຕັດໃກ້ໜ້າດິນ ຫຍ້າເນເປຍແມ່ນເໝາະສົມສຳລັບການໃຊ້ລ້ຽງງົວ ແລະຄວາຍໃນຮູບແບບຫຍ້າສົດ ຫຼື ຫຍ້າໝັກແຫ້ງ.

ແຫຼ່ງຂໍ້ມູນ: http://hukased.blogspot.com

ຂໍ້ມູນເພີມຕື່ມ:

ຂໍ້ມູນເຕັກນິກ:

ວີດີໂອ:

ຕິດຕໍ່:

ຮຽບຮຽງໂດຍ: ສຸລິວົງ ກອງມະນີວົງ, ສູນຂໍ້ມູນຂ່າວສານກະສິກຳ ແລະ ປ່າໄມ້, ສະຖາບັນຄົ້ນຄ້ວາກະສິກຳ, ປ່າໄມ້ ແລະ ພັດທະນາຊົນລະບົດ