ເຂົ້າໜຽວທ່າດອກຄໍາ37

ຊື່ແນວພັນ: TDK37
ຊະນິດເຂົ້າ: ເຂົ້າໜຽວ
ຄູ່ປະສົມ: RD10/TDK1
ທີ່ມາ: ສູນຄົ້ນຄວ້າເຂົ້າ
ຊື່ສາຍພັນ: TDK37-B-9-1-3-B
ປະຫວັດພັນເຂົ້າ: ສາຍພັນ TDK37-B-9-1-3-B ແມ່ນຄັດເລືອກຈາກຄູ່ປະສົມພັນທີ37, ພໍ່ແມ່ດຽວກັບທ່າດອກຄຳ8; ປະສົມພັນລະຫວ່າງ ກຂ10 (ແມ່) ແລະ ທ່າດອກຄຳ1 (ພໍ່) ໃນປີ 1996 ທີ່ສູນຄົ້ນຄວ້າກະສິກຳ-ນາພອກ. ເປັນແນວພັນເຂົ້າຕົ້ນເຕັ້ຍປານກາງ, ບໍ່ຮູ້ສຶກຕໍ່ຊ່ວງແສງ, ອາຍຸນັບແຕ່ມື້ຕົກກ້າຫາອອກດອກແມ່ນ 95-105 ມື້. ປູກໄດ້ທັງນາປີ ແລະ ນາແຊງ, ເໝາະສົມໃນເຂດປູກເຂົ້າ 7 ທົ່ງພຽງ ຂອງແຂວງພາກກາງ, ພາກໃຕ້ ແລະ ບາງແຂວງພາກເໜືອເຊັ່ນ: ແຂວງຫຼວງພະບາງ, ໄຊຍະບູລີ, ຫຼວງນໍ້າທາ ແລະ ບໍ່ແກ້ວ. ການທົດລອງການປັບຕົວ ແລະ ຊາວນາມີສ່ວນຮ່ວມໃນເຂດປູກເຂົ້ານາໂຄກ-ນາໂນນ ຂອງພາກກາງ ແລະ ໃຕ້ ຂອງລາວ ປີ 2008-2010 ແມ່ນໃຫ້ສະມັດຕະພາບ ຂ້ອນຂ້າງລື່ນສະມັດຕະພາບສະເລ່ຍລວມຂອງ ທ່າດອກຄໍາ1 ແລະ ທ່າດອກຄຳ8 ໃນລະດັບ 7%; ທີ່ຈຸດທົດລອງແຂວງວຽງຈັນລື່ນ 15%, ຈຳປາສັກລື່ນ 5% ແລະ ທີ່ສະຫວັນນະເຂດ ແມ່ນບໍ່ແຕກຕ່າງກັນ. ການທົດລອງການປັບຕົວໃນນາປີ 2011 ແລະ 2012 ໃນ 5 ຕົວເມືອງ, ທີ່ແຂວງສະຫວັນນະເຂດ (3) ແລະ ແຂວງຈຳປາສັກ (2) ໃນລະດູຝົນ 2011 ແລະ 2012; TDK37-B-9-1-3-B ໃຫ້ສະມັດຕະພາບ ເທົ່າທຽມກັນກັບ ວຽງຈັນ 450-2, ທ່າສະໂນ9, ທ່າດອກຄຳ11; ແລະ ມີທ່າອ່ຽງໃຫ້ສະມັດຕະພາບ ລື່ນທ່າດອກຄຳ1, ທ່າດອກຄຳ8 ແລະ ທ່າສະໂນ3 ແຕ່ບໍ່ແຕກຕ່າງທາງດ້ານສະທິຕິ ແລະ ໃຫ້ສະມັດຕະພາບລື່ນ ແລະ ແຕກຕ່າງທາງດ້ານສະທິຕິກັບ ໂພນ ງາມ1, ໂພນງາມ3 ແລະ ໂພນງາມ5.

ຈຸດດີ: ເປັນແນວພັນທີ່ທົນທານຕໍ່ການທຳລາຍຂອງພະຍາດໃບໄໝ້ ແລະ ຂອບໃບແຫ້ງ ໃນລະດັບປານກາງ ແລະ ທົນທານໄດ້ດີຕໍ່ພະຍາດເຂົ້າຜູ້. ເມັດເຂົ້າເປືອກສີເຟືອງ, ເມັດຍາວຮຽວຄ້າຍຄື ກຂ 10 ແລະ ເປັນທີ່ນິຍົມຂອງກຸ່ມໂຮງສີ; ມີຄຸນນະພາບໃນການສີເຂົ້ານາປີ ແລະ ນາແຊງດີກວ່າ ທ່າດອກຄຳ1; ກິນແຊບອ່ອນນຸ້ມດີແຕ່ບໍ່ຫອມ, ເຂົ້າເຢັນຍັງຮັກສາຄວມອ່ອນນຸ້ມໄວ້ໄດ້ດີ.
ຈຸດອ່ອນຂອງ: TDK37-B-9-1-3-B ແມ່ນບໍ່ທົນທານຕໍ່ການທຳລາຍຂອງພະຍາດຄໍຮວງເນົ່າ, ເພັ້ຍຈັກຈັ່ນສີນໍ້າຕານ ແລະ ສີຂຽວ, ແມງບົ່ວ ແລະ ດ້ວງກໍ; ປັບຕົວບໍ່ໄດ້ດີໃນດິນນາເປັນກົດທີ່ມີປະກົດ ການເຫຼັກເປັນພິດ. ເວລາເຂົ້າສຸກເຕັມທີ່ລຳຕົ້ນເອ່ນ, ຖ້ານານກ່ຽວເຂົ້າຈະລົ້ມ.