ການປູກໝາກແໜ່ງ

ໝາກແໜ່ງເປັນຜົນຜະລິດທາງດ້ານເສດຖະກິດທີ່ມີຕະຫຼອດຮອງຮັບໂດຍສະເພາະແມ່ນຕະຫຼອດຈີນ.ມີພໍ່ຄ້າຄົນຈີນເຂົ້າມາເກັບຊື້ໝາກແໜ່ງນຳໄປຂາຍໃນໂຮງງານເພື່ອຜະລິດເປັນຢາພື້ນເມືອງ, ເຊິ່ງຕະຫຼອດຈີນມີຄວາມຕ້ອງການຫຼາຍ, ການຜະລິດແມ່ນຍັງບໍ່ທັນພຽງພໍເມື່ອທຽບກັບຄວາມຕ້ອງການຂອງຕະຫຼາດ. ສະນັ້ນມັນຈຶ່ງເປັນເງືອນໄຂ ແລະ ໂອກາດອັນດີໃຫ້ແກ່ປະຊາຊົນລາວເຮົາປູກ ເພື່ອສົ່ງເສີ່ມອອກຕະຫຼອດຈີນໂດຍສະເພາະແມ່ນບັນດາແຂວງທີ່ຕິດກັບຊາຍແດນຈີນ ເຊັ່ນ ແຂວງຜົ້ງສາລີ
I.ຄວາມສຳຄັນຂອງໝາກແໜ່ງ
1.ຮັບປະກັນທາງດ້ານສະບຽງອາຫານ
2.ເປັນລາຍຮັບໃຫ້ແກ່ປະຊາຊົນ
3.ເປັນຢາປົວພະຍາດ
4.ການປູກແມ່ນບໍ່ທຳລາຍຊັບພະຍາກອນທຳມະຊາດ ແລະ ສິ່ງແວດລ້ອມ
II.ວິທີການປູກ
1.ການເລືອກສະຖານທີ່
ບໍລິເວນແຄມນໍ້າ, ເປັນດິນທີ່ອົມນໍ້າ ແລະ ມີອາກາດຖ່າຍເທໄດ້ດີອຸດົມສົມບູນໄປດ້ວຍແຮ່ທາດຕ່າງໆ.ມີຊັ້ນດິນປູກຝັງເລີກ ແລະ ຜຸຜຸຍດີ, ມີຄວາມຊຸມຕະຫຼອດປີ ແລະ ມີຄວາມຄ້ອຍຊັນ 10-15 ອົງສາ, ຕ້ອງມີປ່າປົກຄຸມ, ເພາະວ່າປະລິມານຄວາມຕ້ອງການແສງສະຫວ່າງແມ່ນບໍຫຼາຍ.

2.ການຄັດເລືອກ ແລະ ການຂະຫຍາຍພັນ
ແນວພັນ ໝາກແໜ່ງແຕ່ລະແນວພັນມີລັກສະນະແຕກຕ່າງກັນລາຄາຂາຍກໍ່ແຕກຕ່າງກັນ, ສະນັ້ນກ່ອນຈະນຳໄປປູກຕ້ອງເລືອກເພື່ອບໍ່ໃຫ້ມີພັນອື່ນປົນໄປນໍາ. ການສັງເກດໝາກແໜ່ງປົນແມ່ນສັງເກດ ເວລາມັນອອກດອກ ຈະເຫັນສີຂອງດອກແຕກຕ່າງກັນ ແລະ ຂະໜາດແຕກຕ່າງກັນ, ສີຂອງໝາກແໜ່ງກໍ່ແຕກຕ່າງກັນເຊັ່ນວ່າ: ມີສີແດງ, ຂຽວ, ໝາກນ້ອຍ,ໝາກໃຫ່ຍ ຖ້າເປັນໝາກແໜ່ງນ້ອຍສ່ວນຫຼາຍຈະເປັນໝາກແໜ່ງປ່າ, ສ່ວນໝາກໃຫ່ຍຈະແມ່ນໝາກແໜ່ງພັນປັບປຸງເປັນຕົ້ນແມ່ນໝາກແໜ່ງກວາງຕຸ້ງ.
ການຂະຫຍາຍພັນ ແມ່ນຂະຫຍາຍດ້ວຍໜໍ່ ຫຼື ແໜງທີ່ປົ່ງອອກມາດ້ານຂ້າງເຊິ່ງແໜງດັ່ງກ່າວຈະປົ່ງອອກມາທຸກໆປີ. ຈຸດດີຂອງການຂະຫຍາຍພັນດ້ວຍແໜງແມ່ນຈະບໍ່ມີການກາຍພັນ ຫຼື ໂອກາດກາຍພັນແມ່ນມີໜ້ອຍເຊິ່ງເຮັດໃຫ້ເຮົາສາມາດຮັກສາແນວພັນໄວ້ໄດ້ເພື່ອການປູກໃນພື້ນທີ່ໃໝ່ ປະຫຍັດຕົ້ນທືນ
3.ລະດູການປູກ
ລະດູທີ່ເໝາະສົມໝາກແໜ່ງແມ່ນຢູ່ໃນຕົ້ນລະດູຝົນເພາະຈະເຮັດໃຫ້ໝາກແໜ່ງສາມາດຕິດຂະຫຍາຍພັນໄດ້ໄວຂື້ນ
ວິທີປູກ: ການກຽມດິນກ່ອນທີ່ຈະປູກແມ່ນອານາໄມພື້ນທີ່ໃຫ້ສະອາດ, ໂດຍການຖາງຫຍ້າ ຕັດງ່າໄມ້ບາງສ່ວນອອກເພື່ອໃຫ້ແສງສະຫວ່າງລອດຜ່ານໄດ້
ໄລຍະປູກ: ລະຫວ່າງຕົ້ນແມ່ນ 1X1 ແມັດ, ລະຫວ່າງແຖວຕໍ່ແຖວແມ່ນ 3X3ແມັດ ປູກເປັນແຖວລົງຕາມຄວາມຄ້ອນຊັນຂອງສະຖານທີ່
ເວລາເອົາໄປປູກແມ່ນເອົາໄປທັງເຫົ້ງາເອົາໜໍ່ອ່ອນ ຫຼື ເອົາໜໍ່ທີ່ມີອາຍຸ 1 ປີກໍ່ໄດ້, ກ່ອນຈະປູກຈະຕັດລຳທາງປາຍອອກຈົ່ງໄວ້ 30-40 ຊມ ບໍ່ຄວນປູກເລິກ ຄວາມເລິກຢູ່ໃນ 5-10 ຊມ

4.ການບົວລະບັດຮັກສາ
ຫຼັງຈາກປູກແລ້ວຕ້ອງເອົາໃຈໃສໃນການຖາງຫຍ້າຈົນກວ່າຕົ້ນໝາກແໜ່ງຈະຂະຫຍາຍຕົວທົ່ວພື້ນດິນ, ລະວັງບໍ່ໃຫ້ສັດເຂົ້າໄປທຳລາຍ ຈາກນັ້ນສອງສາມປີຈະບໍ່ໄດ້ເສຍຫຍ້າອີກ
5.ການໃຫ້ໝາກ
ຕົ້ນໝາກແໜ່ງຈະອອກດອກຢູ່ໃກ້ກັບໜ້າດິນ, ແມງໄມ້ເປັນພາຫານະສຳຄັນໃນການປະສົມເກສອນ. ເພື່ອໃຫ້ຕົ້ນໝາກແໜ່ງຜະລິດໝາກແໜ່ງໄດ້ຢ່າງເປັນທີພໍໃຈ ພວກເຮົາອາດສ້າງໂກນເຜິ້ງໃນຂອບເຂດອ້ອມແອ້ມສວນໝາກແໜ່ງ
6.ການເກັບກ່ຽວ
ໝາກແໜ່ງຈະອອກດອກລະຫວ່າງເດືອນເມສາຫາເດືອນມິຖຸນາ ແລະ ສາມາດເກັບກ່ຽວຜົນຜະລິດແຕ່ທ້າຍເດືອນສິ່ງຫາເປັນຕົ້ນໄປ. ໄລຍະແກ່ຕົວຂອງເມັດຈະຢູ່ລະຫວ່າງ 15-20 ວັນ.ການເກັບແມ່ນແຍກເກັບ 2-3 ເທື່ອຕໍ່ລະດູ ເລືອກເກັບສະເພາະໝາກທີ່ແກ່ເທົ່ານັ້ນທັງນີ້ກໍ່ເພື່ີອຄຸນນະພາບດີ ແລະ ລາຄາສູງ ເປັນທີ່ຕ້ອງການຂອງຕະຫຼອດ

7.ການຮັກສາຫຼັງການເກັບກ່ຽວ
ການເຮັດແຫ້ງໂດຍການອົບ: ແມ່ນວິທີເຮັດໃຫ້ໝາກແໜ່ງສົດທີ່ເຮົາເກັບມາຈາກສວນນັ້ນແຫ້ງ ແລະ ເກັບຮັກສາໄດ້ດົນເປັນການເພີ່ມມູນຄ່າໄດ້ອີກ. ງ່າຍໃນການຂົນສົ່ງ, ມີຄວາມເສຍຫາຍໜ້ອຍໃນການເກີດເຊື້ອລາ

ຮຽບຮຽງໂດຍ: ສີວິໄລ ອິນທະວົງ
ແຫຼ່ງຂໍ້ມູນ: ໂຄງການພັດທະນາການຄໍ້າປະກັນສະບຽງອາການແບບຍືນຍົງ,ເມືອງຍອດອູ
ໝວດໝູ່: ການປູກພືດ
ຂໍ້ມູນເພີ່ມເຕີມ:
ຂໍ້ມູນເຕັກນິກ:
ວີດີໂອ:

ຕິດຕໍ່: