ເຂົ້າຈ້າວພັນປັບປຸງ B6144-MR-6
ປະຫວັດຄວາມເປັນມາ.
ເຂົ້າຈ້າວ B6144-MR-6 ເປັນແນວພັນປັບປຸງເຊິ່ງນຳມາຈາກປະເທດອິນໂດເນເຊຍ ໂດຍຜ່ານສະຖາບັນຄົ້ນຄວ້າເຂົ້ານາໆຊາດ (IRRI) ທີ່ໄດ້ນຳມາສຶກສາ ແລະ ຄັດເລືອກໃນປີ 2003. ຜົນໄດ້ຮັບເຫັນວ່າປັບຕົວໄດ້ດຮໃນດິນເນີນສູງ ແລະ ດິນນາ. ເລີ່ມປູກຂະຫຍາຍເມັດພັນໃນປີ 2006.
ລັກສະນະປະຈຳພັນ.
| ປະເພດເຂົ້າ | ເຂົ້າຈ້າວ |
| ຜົນຜະລິດ | 1.4 – 3.5 ໂຕນຕໍ່ເຮັກຕາ |
| ອາຍຸ | 120-130 ວັນ. ບໍ່ມີຄວາມຮູ້ສຶກຕໍ່ຊ່ວງແສງ |
| ລັກສະນະແຕກກໍ | 10 – 15 ຕົ້ນຕໍ່ສຸມ |
| ລວງສູງ | 90-95 ຊັງຕີແມັດ |
| ລັກສະນະຂອງລຳຕົ້ນ | ນ້ອຍບາງແຕ່ແຂງແຮງດີ, ທົນຕໍ່ການລົ້ມ |
| ລັກສະນະຂອງໃບ | ກາບໃບສີມ່ວງ, ແຜ່ນໃບສີຂຽວ, ມີຂົນ |
| ລັກສະນະຂອງຮວງ | ຮວງນ້ອຍ, ເມັດຖີ່, ຮວງຍາວ 20-21 ຊັງຕີແມັດ |
| ສີເມັດເຂົ້າເປືອກ | ສີນ້ຳຕານແກ່, ມີຂົນ |
| ຂະໜາດເມັດເຂົ້າເປືອກ (ສະເລ່ຍ) | ຍາວ 9.8 ມີລີແມັດ, ກວ້າງ 2.80 ມີລີແມັດ, ໜາ 2.20 ມີລີແມັດ |
| ສີເມັດເຂົ້າສານ | ສີຂຽວຂຸ້ນ |
| ຂະໜາດເມັດເຂົ້າສານ (ສະເລ່ຍ) | ຍາວ 8.12 ມີລີແມັດ, ກວ້າງ 2.72 ມີລີແມັດ, ໜາ 2.06 ມີລີແມັດ |
| ຮູບຮ່າງ | ກາງ |
| ນ້ຳໜັກ 1,000 ເມັດ | 23 ກຼາມ |
| ຄຸນນະພາບການກິນ | ແຂງ, ບໍ່ຫອມ |
| ເປີເຊັນການສີ | ສູງ (67%) ປະລິມານທາດອາມີໂລດ 22.8% |
ຈຸດດີ ແລະ ຈຸດອ່ອນ.
• ຈຸດດີ: ສາມາດປູກໄດ້ໃນພື້ນທີ່ໄຮ່, ພື້ນທີ່ນາລະດູຝົນ ແລະ ລະດູແລ້ງ. ປູກໄດ້ກັບດິນເຂດປ່າເລົ່າອ່ອນ ແລະ ປູກຕໍ່ເນື່ອງ, ລຳຕົ້ນແຂງແຮງດີ, ທົນທານຕໍ່ການລົ້ມ ແລະ ທົນທານຕໍ່ແມງໄຂ່ປາ ແລະ ພະຍາດຈຸດສີນ້ຳຕານ. ສາມາດແປຮູບໄດ້ຫຼາຍຢ່າງເຊັ່ນ: ເຂົ້າປຸ້ນ, ເຝີ ແລະ ເສັ້ນໝີ່. ຕອບສະໜອງຕໍ່ຝຸ່ນໄດ້ດີ.
• ຈຸດອ່ອນ: ເມັດນ້ອຍ, ເມັດຄາຍ, ຄຸນນະພາບການກິນແຂງເວລາຫຸງຕ້ອງໄດ້ໃສ່ນ້ຳຫຼາຍ, ບໍ່ຫອມ, ບໍ່ທົນຕໍ່ການທຳລາຍຂອງແມງບົ່ວ.
ວິທີປູກ.
ສະຖານທີ່ແນະນໍາປູກ.
ສາມາດປູກໄດ້ໃນພື້ນທີ່ມີລະດັບຄວາມສູງຈາກໜ້ານ້ຳທະເລ 200-1,300 ແມັດ. ປູກໄດ້ດີໃນທຸກພາກຂອງປະເທດ ເຊັ່ນ: ແຂວງບໍ່ແກ້ວ, ໄຊຍະບູລີ, ຫຼວງພະບາງ, ອຸດົມໄຊ, ຫຼວງນ້ຳທາ, ນະຄອນຫຼວງວຽງຈັນ, ສະຫວັນນະເຂດ ແລະ ຈຳປາສັກ.
ການປູກ.
ຄວນນຳໃຊ້ແນວພັນປູກໃນອັດຕາ 60-80 ກລ/ຮຕ. ຄວາມງອກບໍ່ຕ່ຳກວ່າ 85%, ໄລຍະຫ່າງການປູກ 25 x 25 ຊມ, ຈຳນວນ 5-6 ເມັດຕໍ່ຂຸມ ແລະ ສັກເລິກປະມານ 2-3 ຊມ. ເພື່ອປ້ອງກັນການທຳລາຍຂອງສັດຕູພືດ.
ລະດູການປູກ.
ລະດູການປູກທີ່ເໝາະສົມແມ່ນທ້າຍເດືອນເມສາ ຫາ ເດືອນພຶດສະພາ, ຖ້າປູກຊ້າຈະເຮັດໃຫ້ຜົນຜະລິດຫຼຸດລົງ.
ການບົວລະບັດຮັກສາ.
ຫຼັງຈາກສັກເຂົ້າແລ້ວປະມານ 15-25 ວັນ ຄວນເສຍຫຍ້າຄັ້ງທີ 1, ບໍ່ຄວນໃຫ້ຫຍ້າສູງເກີນໄປເພາະຫຍ້າຈະຍາດທາດອາຫານຈາກຕົ້ນເຂົ້າ ແລະ ເປັນບ່ອນລີ້ຊ່ອນຂອງແມງໄມ້.
ການໃສ່ຝຸ່ນ.
ຖ້າເປັນພື້ນທີ່ມີຄວາມຄ້ອຍຊັນບໍ່ແນະນຳໃຫ້ໃສ່ຝຸ່ນເພາະຈະເຮັດໃຫ້ຝຸ່ນເຊາະໄຫຼໜີ. ຖ້າເປັນພື້ນທີ່ຮາບພຽງ ຫຼື ພື້ນທີ່ນາທີ່ມີຄວາມອຸດົມສົມບູນຂອງດິນຕ່ຳຫາປານກາງ ມີການກຽມດິນ, ແນະນຳໃຫ້ໃຊ້ຝຸ່ນສູດ 15-15-15 ຮອງພືນກ່ອນການປູກຈຳນວນ 100 ກລ/ຮຕ ແລະ ຝຸ່ນເລັ່ງຈໍານວນ 50 ກລ/ຮຕ ( ຝຸ່ນຢູເຣຍ 46-00-00 ) ໃສ່ຫຼັງຈາກປູກ 45 ວັນ.
ໝາຍເຫດ: ການປູກເຂົ້າແນວພັນນີ້ຮ່ວມກັບແນວພັນເຂົ້າປີຈະເຮັດໃຫ້ຜົນຜະລິດເຂົ້າເສຍຫາຍຫຼາຍ ຍ້ອນການທຳລາຍຂອງນົກ ແລະ ໜູ.
ແຫຼ່ງຂໍ້ມູນ: ຄຳແນະນຳ ການນຳໃຊ້ແນວພັນເຂົ້າສຳລັບພາກເໜືອຂອງລາວ, ໂຄງການຄົ້ນຄວ້າລະບົບການຜະລິດກະສິກຳ ໂດຍເອົາເຂົ້າເປັນພື້ນຖານ ໃນເຂດພູດອຍ ຢູ່ພາກເໜືອ.
ຂໍ້ມູນເພີມຕື່ມ:
ຂໍ້ມູນເຕັກນິກ:
ວີດີໂອ
ຮຽບຮຽງໂດຍ: ສຸລິວົງ ກອງມະນີວົງ, ສູນຂໍ້ມູນຂ່າວສານກະສິກຳ ແລະ ປ່າໄມ້, ສະຖາບັນຄົ້ນຄ້ວາກະສິກຳ, ປ່າໄມ້ ແລະ ພັດທະນາຊົນລະບົດ